يا ليل رح قله ترا الحال منهار =وخلك رسول الشوق بينه وبيني
وقله ترا قلبي توقد على نار =من ليلة البارح وانا افرك يديني
راحت بي افكاري ورا حد سنجار = وانطر متى مرسول خلي يجيني
ياليل قل للعاشق الصادق البار =وش اخر علوم الغلا يا ضنيني
وقله علامه عرض البارح طيار =عراض حيين ن على ميتيني
روح وخلاني مع الغار والنار = اصيح له بالصوت ما لد فيني
ياليل قبل ادق في اللوح مسمار =با عطيك مرسومي وبصمة يميني
ومن طاع هقواته مع كل مشوار =تاهت به الحجه ولو بعد حيني
خلك معي شاهد قبل تاتي كبار =باكتب حروف للظروف تحكيني
ومادام خلي قال لك هات الاخبار = اقرا له المرسوم عني بحيني
يا بنت انا من لابة ن دمها حار =ما تعرف الذله ولا تستهيني
وقت الخطر نمشي على درب الاخطار =وملوك غاب ما نهاب الحصيني
وسنون شر تصك في روس الاشرار=واطيب من العنبر مع الطيبيني
عاداتنا ماننتهك حرمة الدار=وتاريخنا يا بنت درع حصيني
من طيبنا ماحدن تعدا على الجار =في وقتنا واسلافنا الاوليني
با عطيك لي موجز تحت ضوء الانوار =قبل ارفع شراعي واعني سفيني
يا بنت انا رجال ما حولي غبار =ادين بالمعروف واسد ديني
شفت القهر والضيم وشريت الامرار =ولا رضيت اذل واحني جبيني
شاعر ,وفي , خلف الكواليس لي كار =وارث مزايا الطيب من والديني
لو اتقدم في محطات الاقمار = اغناني الجمهور والمعجبيني
ملكي وراس المال عشرين دينار =لاتحسبين اني ورثت المزيني
وان كانكم يا بنت في السوق تجار = ما ني بقايل يوم بكره عطيني
الدرب واضح وانت يمديك تختار =ولا تحير بين غيري وبيني
اما تيامن وقف بصف نيزار = والا تياسر صوب صف الخميني
والطوشري لولا سواليف غوار =ماحدن سمع بالطوشري يا ظنيني
لو قلت ودك بي ولو صار ما صار = وابغاك من جور الزمان تحميني
حطيت لك عندي مكانه ومقدار =اقدرك بالحب وتقدريني
واسقيك من كاس العشاشيق قنطار =واضماك واشرب منك واسقي سنيني
واصير لك قيس الملوح بالا شعار = واقول ابي ليلى وليلى تبيني
وانثر لك ابيات الشعر فوق الاوتار =تسري على مسحوبها والهجيني
والقلب لي حبك له الحق لي غار =وان كان قلبك حبني صارحيني
ترا شعور الحب دافي وسحار =ينسيك كل همومك بحاجتيني
اذا صفى خلاك باش وحكم دار =وان بار يلعن جد ابو الطيبيني
ان كان حبك صار طاغي وجبار =با قول يا غض النهد صبريني
وان حدنا جيش الغلا جيت مسيار =وانتي على جمر الوله تحتريني
امسك يدينك واسكت شوي محتار =والمك لصدر جذب لك ونيني
واشم ريح انفاس عطرك لما ثار =بين الثنايا يزهم الشوق فيني
لحظة معا وجدان امل باشة الدار = تسوى الزمان اللي مضى والسنيني
وكثر التغلي والخطايا والاعذار =ترخص مكانة حبنا صدقيني
وان كان قلبك ملته دين الانصار =خلك على دينك وانا ابقى لديني
وان كان تبغى لعبة القط والفار =با سحب ملفاتي وبارفع يديني
فاذا المحبه عندكم ضحك وهزار =ماني بفاضي واعذري واسمحيني
واللي مضى يا بنت خليه تذكار =اباذكرك بالخير وانتي اذكريني
انا عطيتك كل وجهات الا نظار =عل وعسى من بعدها تفهميني
وان خربت الرصه ولا جات مقطار =فيالله زينها عساها تزيني