القوافل العربية - قصيدة غرام أحباب صوتية

القصيدة كتابية

على ذاك الطريق اللي يسمونه غــرام احباب
وطت رجلي على دربه ولا ادري وش نوا فينـي

تبعته لاخر ادروبه الين ان القمر قــــد غاب
تعب قلبي ولا تعبت مسافات تودينــــــي

لقيت الليله الجردا هدب ظل وسما واعشــاب
بعد ذاك الظلام اللي يتوهني عناوينـــــي

صدفتك معجبة فيني وياليت الغـرام اعجــاب
وتراك انتي الهنوف اللي هقيتك تستحقينـــي

عطيتك عشق من قلبي وسلمت الغلاك ارقـاب
وغيرك يحترق قلبه ولا يقدر يحاكينـــــي

انا قبلك صدفت عيون ولكن ويش جـاب لجاب
ترا كل العيون اللي لقتني ما تكفينــــــي

رماني حظي العاثر عليك وجيتلك طـــــلاب
ولانتي اللي عشقتيني ولا انت اللي عتقتينــي

تعالي وارحمي ذاك الخفوق المولع المرتـــاب
مهوب لجلي عشان الله يجازيك ويجازينــــي

تعدي في سما عشقي ولو عشقي خراب اصحاب
وصوني بالهوى نفسك قبل لنتي تصونيني

وشيليني على متنك خفوقاً بارياً منصاب
ومن فوق الغرام العذب شيليني وحطيني

ولا منك هقيتيني شجاع وما يطيق ايهاب
انا لك بالهوى والله مثل منتي هقيتيني

انا ممشي ورا غيرك ولو انه يطق الباب
وترى عيباً علي اطعن ولو كثرت سكاكيني

زهوداً ما يطيق الدم لا داين ولا طلاب
شجاع وعارفاً نفسي واظن انك تعرفيني

غيور ما عرفت اضحك مع الغدر ابرود اعصاب
ابيع اعيوني الثنتين قبل انك تخونيني

وذا شد الغرام احط قلبي بين ناب وناب
لفرقا تكسر ضلوعي ولا عشقاً يوطيني

انا رجلاً ولي غيرة اذا شفت الهوى كذاب
تثور بقلبي الفزعة ولا تهدى شياطيني

سؤالك لو يزعزع بي كياني ما قبلت اعتاب
اجيلك وسألك نفس السؤال اللي سألتيني

عن العشق القديم ابواب وتقفيها كثير ابواب
بعد ذاك الحبيب اللي خدعني وانخدع فيني

ابي عشق اتحسب له كل نظرات العيون احساب
وابي قلباً على قلبي وابي ديناً على ديني

ابي كلمة عهد توفي ولا تخلف بدون اسباب
وابي منك قبل لنتي تصديني توديني

وابي درباً على العذال صعب ومتعب وغلاب
وابي نفس الطريق الصعب يبعدهم ويدنيني

ترى لولا القلوب اعيون ودموع العيون اهداب
حشى ما تنزل الدمعة لغيرك لو تركتيني

انا اول من عرف قدرك وان توي صغير وشاب
وبي منك مدام انك عرفتيني تحبيني

مدام اني لقيتك في طريق اسمه غرام احباب
دخيل الله وبعد الله دخيلك لا تخليني

مدام ان كل من يحي على وجه التراب تراب
عسى تنساني الدنيا مدام انتي ذكرتيني

الشاعر حامد زيد