يقولون الجبل شامخ وأنا قول الجبل راسي=لكنه ما منع شاهين لا حلق على راسه
وأنا لو الزمه بنسفه لين يصير متواسي=ياراع الصدق باسي بالفكر أشد من باسه

صحيح ان الجبل راسي صحيح ان الجبل قاسي= على الارض متواسي يارفيقي ثابت(ن) ساسه
تقدم واحتزم ياصاحبي بالدرع والطاسي= وشن الحرب فوقه واقرع طبوله مع اجراسه

يحسب إني تركت المملكة من غير حراسي=جنود المملكة لحدودها ماتنام حراسه
يقولون العرب السيف ماهو صنعة الفاسي=غزير البحر ما ينقصه طرقي شرب في طاسه

اقول انك سواة امن الطرق بالحيل حساسي= ورب البيت معطيك الذكا وشعور حساسه
ترى اللي ساكن(ن) في فاس يطلق فوقه الفاسي= والا يااللي نويت البحر قيسه واعرف قياسه

ياراع الصدق ليش الزير وده ذبح جساسي=يشب الحرب شرق وغرب والأعراق دساسه
ترى ما كل ما يلمع يشابه لمعة الماسي=لو البلور يغلا كان قلت قيمة الماسه

عشان الناقه القشرا ذبحها نجس الانجاسي= وصارت مشكله وحلولها بالحيل منحاسه
على ريح المطر بدو الشمال تدز عساسي= وعلمه صار مثل الصك قالوا قال عساسه

أنا للحرب والم يافتى جيشي ومتراسي=وبقصف قوة الخصم الشقي واهد متراسه
يقولون المقنع ما يبان الوجه والراسي=وأنا اقول المقنع ينعرف من ريحة أنفاسه

مريكا دولة(ن) عظمى لها هيبه مع الناسي= ليا منه ذكرها الخصم فز وزاد وسواسه
الا ياراعي المحماس جا للبن حماسي= مصير البن يحمس فوق نار بوسط محماسه

أنا ماهمني بالوقت لا عاري ولا كاسي=لو إنه يطلع المريخ في مركبة ناسه
ياراع الصدق لا تلحق يدينك كهرب الماسي=تعوذ من بليس وهاك شربة مي بالكاسه

يبا ياتيك مع دربه شماس وبعد شماسي= وقريب تجيك ياذيبان فالمجلاس شماسه
انا ماداني اللي مع ربوعه دوم بلاسي= اعوذ بربنا المعبود وادحر كل بلاسه

ترى النحال لا حصل عرام يجيب منخاسي=وهذي عدة النحال دوم يشيل منخاسه
ياراع الصدق لا توقد حرائق روس الأطعاسي=ليا شبت حريقه تكره الدخان وعماسه

انا اقول ان بنكي مايساوي بنك الافلاسي= ربح بنك الرياض وساب بكره يعلن فلاسه
الا يابن هليل عافيه خارج من الباسي= ترانا مسلمين ولانحب البغض واوقاسه

ترى منهو غرس في غير داره خاب مغراسي=وراع الصدق دايم ما يخيب نبت مغراسه
ليا خسرت بنوك الكفر بنك الدين نوماسي=وراع الدين دايم طيب(ن)قوله ومجلاسه

الا يابن هليل قدوتي فالعلم نبراسي= ولا خابو رجال (ن)يقتدون بنور نبراسه
احد يلبس ثياب البز واحد(ن) يلبس اللاسي= واحد يعجب ببزه واحد يعجب من لبس لاسه