حبيت انقل لكم قصيدة
عذب السجايا
وهي من احدى روائع الشاعر مساعد الرشيدي
عذب السجايا وعوده بـأول الكنـه=متى تزين السوالف وآخذ علومـه
واسامحه عن خطاه الجرح والونـه= واعاتبه لو يصـد شـوي والومـه
واذكره باول المسفـار حتـى إنـه=لا من تذكر زمان اول نسى نومـه
يوم إنه اقبل خدين الـروح يومنـه=واقبلت اراعيه والقومه هي القومه
من يومها والحشا ما عاد له خنـه=إلا لصوتـه وميعـاده وملزومـه
عفري هنف للضلوع وجا لهن حنه=واستانست له فياض القلب ورجومه
لبى جبينه لا ارتـج الغطـا كنـه=برق يصب الرفيف بكبـد ديمومـه
ما اقول شفته وشفت البيض يتلنـه=اقول شفته وشفت الشمس منجومه
ما اقول كن الجديل الليـل لاكنـه=ليل خرعه الظلام وضيـع نجومـه
يا قبلـة الله هكـا العنقـود لامنـه=قام يتهجا شذا عطـره ويشمومـه
فيه انتهى النور لا والله بـدا منـه=فجر نعس بالوريد ونـام بهدومـه
ورد تفرعن حمـاره قلـت اباكنـه=الى متى والحنايـا منـه مفطومـه
فز وتطرق رطيبه قلت مـا عنـه=بالم شيحـه وريحانـه وقيصومـه
صد وتلعثم هديله فـي بـرد سنـه=يا قوم ذا النور يوم انكت يا قومـه
الله عطانيـه والله يعطـي الجنـه=واليا استجد الهوى كل ومقسومـه