يا سلامي سلام ٍ(ن)ياصل الطحطوح=بدعة الشعر مبداها وفأولها
يابروق ٍ(ن)على قطر الرياض تلوح=خلتها وابن غافل ما يخيلها
قبل الأعمار يا طلق الحجاج تروح=والليالي تبدل في تداولها
قمت اجر اللحون وهاجسي مملوح=والقوافي من الهاجس مفولها
يا هلال الثبيتي بين صمت وبوح=النوايا سليمة ما نبدلها
بعدها كيف حالك ياعديل الروح=يا عساكم بخير ولا بطولها
السوالف ليا طالت بلا مصلوح=عيب والناس ما ودي نزعلها
مختصر ما نقولة ما يعيز شروح=زبدة العلم ناويها ومرسلها
كان ودك تخاويني نبا مطروح=ديرة (ن) خابرك تعرف منازلها
زهب الزاد والمزود بدون شحوح=والهمام الركايب لا تعقلها
سوقها لين تتعب من شقا وفروح=واطلب الله ليا انعاجت يعدلها
يا سلامي سلام ٍ(ن)ياصل الطحطوح=بدعة الشعر مبداها وفأولها